Apple, iPhone 17 təqdimat tarixini rəsmi olaraq açıqladı

Apple çoxdan gözlənilən "Awe Dropping" tədbirinin tarixini açıqlayıb. İllərdir maraqla izlənilən iPhone 17 Air və iPhone 17 Pro Max modellərinin nə vaxt təqdim olunacağı sualı da artıq cavabını tapdı.

Şirkət rəsmi olaraq bildirib ki, iPhone 17 təqdimat tədbiri 9 sentyabr 2025-ci il, çərşənbə axşamı günü keçiriləcək. Tədbir hər zaman olduğu kimi Apple Park kampusunda baş tutacaq və Bakı vaxtı ilə 20:00-da başlayacaq.

iPhone 17 seriyası 9 sentyabrda gəlir

Bu ilin ən böyük təqdimatında Apple, tamamilə yenilənmiş iPhone 17 seriyasını nümayiş etdirəcək. Seriyaya iPhone 17, iPhone 17 Pro, iPhone 17 Pro Max və hamının maraqla gözlədiyi iPhone 17 Air daxil olacaq.

iPhone 17 Pro modellərinin alüminium çərçivəli daha davamlı dizayna, həmçinin yenidən işlənmiş arxa kamera moduluna sahib olacağı gözlənilir. Bütün seriya gücləndirilmiş A19 və A19 Pro çipləri ilə gələcək və ProMotion texnologiyası ilk dəfə bütün modellərdə standart olacaq.

Apple-ın “ən incə və ən yüngül” smartfonu olacaq iPhone 17 Air isə 6.6 düymlük ekran, şirkətin yeni C1 modemi və tək linzalı arxa kamera ilə təqdim ediləcək. Bu il iPhone 17 Plus modeli olmayacaq.

Get ready for an awe dropping #AppleEvent on Tuesday, September 9! pic.twitter.com/uAcYp2RLMM

— Tim Cook (@tim_cook) August 26, 2025

Apple Watch, AirPods və daha çox yenilik

Təqdimatda təkcə iPhone-lar olmayacaq. Apple həmçinin Apple Watch Series 11, Apple Watch Ultra 3 və Apple Watch SE 3 modellərini də nümayiş etdirəcək. Üç ildən sonra ilk dəfə bütün Apple Watch seriyası eyni anda yenilənəcək.

Sürprizlər də gözlənilir – bunlar arasında AirPods Pro 3, yeni HomePod mini və təkmilləşdirilmiş Apple TV 4K modeli ola bilər.

Bundan əlavə, Apple tədbirdə iOS 26, iPadOS 26, macOS Tahoe və digər proqram yeniliklərini də təqdim edəcək.