AI dəstəyi ilə ucuz aviabilet tapmaq mümkün oldu!

Google süni intellektlə işləyən “Flight Deals” xidməti təqdim etdi

Google bu gündən süni intellektlə dəstəklənən ucuz aviabilet axtarış xidməti – Flight Deals-i istifadəyə verib. Xidmət önümüzdəki bir həftə ərzində tədricən istifadəyə açılacaq və ya xüsusi veb səhifə üzərindən, ya da Google Flights-ın sol yuxarı menyusundan əlçatan olacaq.

Hazırda yalnız ABŞ, Kanada və Hindistanda beta versiyada istifadəyə verilir. Google-un sözlərinə görə, məqsəd istifadəçi rəylərini toplamaq və süni intellektin səyahət planlaşdırmasını necə yaxşılaşdıra biləcəyini öyrənməkdir. Xidmət, əsas məqsədi növbəti səyahətdə pul qənaəti olan çevik səyyahlar üçün hazırlanıb.

İnterfeys chatbot formatındadır. Sadəcə haraya, nə vaxt və necə səyahət etmək istədiyini təbii dildə təsvir edirsən – sanki dostunla danışırsan – və Flight Deals qalan işi özü görür.

Artıq ən ucuz bileti tapmaq üçün tarixləri, istiqamətləri və filtrləri əl ilə dəyişməyə ehtiyac yoxdur. Süni intellekt bütün axtarışları arxa planda edərək, nəticələri səliqəli və anlaşılan formada təqdim edir.

Google-un verdiyi nümunələrə görə, belə sorğular yazmaq mümkündür: "Qışda bir həftəlik, dadlı yeməkləri ilə məşhur şəhərə, yalnız birbaşa uçuş" və ya "10 günlük, təzə qar örtüklü dünya səviyyəli xizək kurortuna səyahət". İstədiyin hər şeyi soruşaraq sınaya bilərsən.